కిటికీ

ఉదయపు సుప్రభాత వేకువని,

సూర్యుని వెలుతురితో ఛాయని,

వర్షపు ధారలతో మేఘాన్ని,

చందమామ వెలుతురులో మలయా మారుతాన్ని,

పండు వెన్నెల జిలుగులతో నక్షత్రాన్ని,

నిశ్శబ్ధ నిశీథిలో మౌనాన్ని ... 

            ప్రకృతి తో మనల్ని అలరించే కిటికీ .. 

             ఇంటింటి కిటికీ ఇంపైన కిటికీ ... 

              నీ ఇంటి నా ఇంటి తెరచిన కిటికీ !!

బాల్యపు మురిపాల కేరింతలు,

యవ్వనపు సొగసుల పలవరింతలు,

ప్రౌఢపు వన్నెల కేళిరింతలు,

వృద్ధాప్యపు ముడతల భాష్యాలు,

పెళ్లి పేరంటాళ్ళ పండుగలు,

మొదటి చివరీ మజిలీలు..... 

              ఎదిగే ఒదిగే సందళ్ళు చూసిన కిటికీ ... 

              ఇంటింటి కిటికీ ఇంపైన కిటికీ ... 

              నీ ఇంటి నా ఇంటి తెరచిన కిటికీ !!

కలతలనీ .. కన్నీళ్ళనీ ... 

సంతోషాలనీ ... సంకటాలనీ .. 

మనసులనీ ... మమతలనీ ... 

జీవిత చరిత్ర ఊసుల్ని .... ఇంటి గుట్టులనీ.. 

వంట ఇంటి ఘుమ ఘుమలనీ ...  వచ్చే పోయే బాటసారులనీ .. 

బజారున పోయే కూరలమ్మి నీ ... జోరుగా సాగే దుమ్ములాటనీ ...  

                 గాలి వాటుగా తెచ్చే వేగుల కిటికీ .. 

                ఇంటింటి కిటికీ ఇంపైన కిటికీ ... 

              నీ ఇంటి నా ఇంటి తెరచిన కిటికీ !!